Մաշկի խնամքն այժմ ինստագրամյան հասարակության ամենաքննարկվող թեմաներից է: Բոլորն են խոսում դրա նշանակալիության և անհրաժեշտության մասին, սակայն որտե՞ղ, ե՞րբ և ինչպե՞ս սկսել այդ կարևոր ճանապարհորդությունը, մշտապես անպատասխան է մնում:
Մինչդեռ շուկայում հարյուրավոր ապրանքանիշներ ներկայացնում են տասնյակ տարբեր միջոցներ, այս հիգիենիկ լաբիրինթոսից դուրս գալու համար մերօրյա կինը չափից դուրս սուղ ժամանակ և էներգիա ունի:
Իհարկե, մտերիմ ընկերուհու սիրելի միջոցը, որը “փրկել է նրա կյանքը” և ազատել նրան բազմաթիվ հոգսերից, հաճախ, գեղեցիկ և առողջ մաշկ ունենալու մեր միակ վստահելի տարբերակն է դառնում, սակայն մշտապես պետք է հիշել, որ մարդու օրգանիզմն ինքնին եզակի է, և միջոցները, որոնք կատարելապես ներազդել են քեզ շատ վստահելի մարդու մաշկին, կարող են հակառակ արդյունք ունենալ քեզ համար:
Խնամքում առաջին և թերևս ամենաաններելի սխալներից մեկը սեփական մաշկի տեսակը չիմանալն է, քանզի առանց պարզելու դրա առանձնահատկություններն ու անհրաժեշտ խնամքը, շատերս օգտագործում ենք պարագաներ, որոնք էլ ավելի են վնասում այն:
Որպեսզի ավելորդ անգամ չվատնես ռեսուրսներդ և ժամանակդ, նախ և առաջ արի՛ հասկանանք, թե ինչ մաշկի տեսակներ կան և բացահայտենք թե դրանցից որին է համապատասխանում քոնը:
1. ՅՈՒՂՈՏ
Յուղոտ մաշկը ուղեկցվում է ճարպի գերարտադրությամբ (սեբում), մշտական յուղային փայլով և խցանված ծակոտիներով, ինչպես նաև կարող է պատճառ հանդիսանալ այնպիսի խնդիրների առաջացման, ինչպիսին են սև կետերը և կորյակները:
Յուղոտ մաշկը պայմանավորված է ՝
- Գենետիկ ֆոնով (ժառանգական գործոն)
- Հորմոնալ խնդիրներով
- Սխալ խնամքով
- Սննդակարգով
2. ԿՈՄԲԻՆԱՑՎԱԾ
Կոմբինացված մաշկը այլ կերպ կարող ենք անվանել խառը տիպի մաշկ, քանի որ տվյալ տեսակին բնորոշ է թե՛ չորություն, թե՛ յուղայնություն և թե՛ գրգռվածություն:
Կոմբինացված մաշկը տարվա յուրաքանչյուր եղանակին դրսևորվում է տարբեր կերպով:
Ամռան շոգին այն կարող է հանդես գալ յուղոտ մաշկին բնորոշ առանձնահատկություններով, իսկ ձմեռային խիստ եղանակին առանձնանալ չոր մաշկին բնորոշ հատկանիշներով:
Արյան լավ շրջանառության արդյունքում մաշկին հատուկ է առողջ և միատոն մակերևույթ:
3. ՉՈՐ
Գրգռվածություն, կարմրություն, չորություն, թեփոտում, այս ամենը բնորոշ է չոր մաշկին, որը ուղեկցվում է դրա pH (թթվային ու հիմնային միջավայրի չափման միավոր) բալանսի խախտմամբ և ջրազրկված հյուսվածքներով:
4. ՆՈՐՄԱԼ
Ամենաիդեալական մաշկի տեսակն է, չնայած բավականին հազվադեպ է հանդիպում:
Նորմալ մաշկի դեպքում լիպիդները (ճարպագեղձեր) ճիշտ քանակությամբ են արտադրվում, դա էլ ապահովում է մաշկի կայուն ֆունկցիոնալությունը և խոնավություն, ինչի արդյուքում էլ մաշկը միշտ առողջ երանգ ունի, առաձգական է, իսկ ծակոտիներն անզեն աչքով տեսանելի չեն:
***
Իսկ ինչպե՞ս հասկանալ ՝ որն է քո մաշկի տեսակը:
Ահա մի պարզ եղանակ.
Առավոտյան լվա՛ երեսդ նուրբ մաքրող միջոցով
Սպասի՛ր 1 ժամ
Սկսի՛ր զզնել երեսդ
Շոշափելով մաշկդ կհասկանաս, եթե T-աձև (ճակատի և քթի հատվածը) և C-աձև (այտերի և կզակի հատվածը) զոնաները յուղոտ է թվում, ապա մաշկդ յուղոտ է:
Եթե յուղոտության զգացողություն կա միայն T-աձև զոնայում (ճակատի, քթի և կզակի հատվածը), իսկ C-աձև զոնայում (այտերի և կզակի հատվածը), ընդհակառակը, չորություն ես նկատում, ապա մաշկդ կոմբինացված է:
Եթե դեմքիդ տեղ-տեղ կան կարմրած, գրգռված հատվածներ, և չորություն ես զգում, ապա մաշկը չոր է:
Եթե մաշկդ առողջ փայլ ունի, միատոն է և առանց ավելորդ յուղոտվածության, ապա շնորհավորում ենք, դու երջանիկ աստղի տակ ես ծնվել և նորմալ մաշկ ունես:
Այնուամենայնիվ, չկա լավ կամ վատ մաշկի տեսակ: Մարդ իր կյանքի ընթացքում կարող է անցնել մաշկի մի տեսակից մյուսին, պարզապես անհրաժեքշտ է կիրառել ճիշտ և բալանսավորված խնամք:
