SPF-ի մասին մենք հիշում ենք միայն ամռանը, բայց քչերն են պատկերացնում, որ արշավների գնալիս, լողավազանի մոտ կամ ծովի ափին արևարյուքի կամ անգամ այդքան երանելի «золотистый загар»-ի համար շատ թանկ ենք վճարում, այն էլ` մեր առողջության հաշվին:
Որպեսզի արևի ճառագայթների ազդեցությունը մաշկի վրա տեսանելի լինի, ծիրանը դրեք արևի տակ: Եթե մեկ ժամ անց ետ վերադառնաք, կտեսնեք, թե հյութալի ծիրանը ինչպես է «ծերացել», ջրազրկվել, իսկ կեղևը՝ կռկվել:
Ծիրանի կեղևը տեքստուրայով շատ նման է մեր մաշկին: Պարզապես ծիրանն արդյունքում ընդամենը չիր կդառնա. մենք այդքան հեշտ չենք պրծնի
Մաշկի ծերացման 10%-ն ունի ժառանգական բնույթ, հաջորդ 10%-ի համար պատասխանատու են սնունդը, թերի քունը, սթրեսը, միջավայրի աղտոտումը, ինչպես նաև ծխախոտի օգտագործումը, և մի աբողջ 80%-ով մաշկը վաղաժամ ծերացման վտանգի են ենթարկում արևի ուլտրամանուշակագույն ճառագայթները: Իսկ եթե չես ուզում 30-ում արդեն բոտոքսի, լիֆթինգի կամ հակատարիքային այլ պրոցեդուրաների կարիք ունենալ, ապա սկզբի համար շարունակիր կարդալ:
Ըստ էության, արևապաշտպան քսուքները (այսուհետ՝ SPF) պաշտպանիչ էկրան են մեր մաշկի և արևի ուլտրամանուշակագույն ճառագայթների միջև: SPF(Sun Protection Factor)-ի կողքին նշված թիվը ցույց է տալիս պաշտպանության աստիճանը: SPF50-ը նշանակում է, որ արևի ճառագայթների 1/50-ն է միայն հասնում ձեր մաշկին, այլ կերպ ասած՝ SPF50-ը պաշտպանում է ձեր մաշկը արևի ճառագայթներից 98%-ով:
Ուշադիր եղեք, որ SPF-ն ունենա և՛ UVB, և՛ UVA պաշտպանություն: Ի՞նչ են դրանք իրենցից ներկայացնում. UVB ճառագայթները կարող են ներթափանցել մաշկի միայն վերևի շերտեր՝ առաջացնելով այրվածքներ, մաշկի պիգմենտացիա և ցանավորում: Մինչդեռ UVA ճառագայթները հասնում են մաշկի խոր շերտեր և ազդում ԴՆԹ-ի վրա՝ բերելով մաշկի վաղաժամ ծերացման, կնճռոտման և անգամ մաշկի քաղցկեղի:
Ի դեպ, արևապաշտպան ակնոցները նույնպես պետք է ունենան UVB/UVA պաշտպանություն:
Ե՞րբ օգտագործել և ի՞նչ հաճախականությամբ.
Ամռան սեզոնին, մանավանդ մեր բնակլիմայական պայմաններում, դեմքին պետք է օգտագործել առնվազն SPF50, տարվա մյուս եղանակներին՝ SPF30: SPF-ն անհրաժեշտ է քսել դեմքի և մարմնի այն հատվածներին, որոնք հագուստով պաշտպանված չեն:
SPF-ը պետք է օգտագործել տանից դուրս գալիս 15 րոպե առաջ: Այն կիրառվում է առավոտյան խնամքի վերջին փուլում՝ խոնավեցնող քսուքից հետո, կամ մինչ դիմահարդարումը սկսելը՝ դիմահարդարման հիմքի կամ տոնային քսուքից առաջ: Քսուքը պետք է թարմացնել ամեն 2 ժամը մեկ, իսկ եթե առատ քրտնարտադրություն ունեք կամ լողում եք, ապա՝ ավելի հաճախ:
Մարմնի, դեմքի և շուրթերի SPF միջոցները տարբեր են, և այո՛, շուրթերին նույնպես պետք է օգտագործել SPF բալզամ կամ մեկ այլ միջոց, քանի որ շուրթերն ավելի արագ են ծերանում:
Ինֆորմացիան միգուցե շատ էր և ծավալուն, բայց հավատացե՛ք, այս կերպ դուք ներդրում եք կատարում առաջին հերթին ձեր առողջության, իսկ հետո արդեն ձեր երիտասարդության և գեղեցկության համար:
